Halal Love Story- Feels Good👌🙏

 

സുഡാനി ഫ്രം നൈജീരിയ എന്ന മികച്ച സിനിമയ്ക്ക് ശേഷം സക്കറിയ ഒരുക്കുന്ന രണ്ടാമത്തെ സിനിമയാണ് "ഹലാൽ ലവ് സ്റ്റോറി".

ആമസോൺ പ്രൈം വഴിയാണ് ചിത്രം ഇന്ന് പുറത്തിറങ്ങിയത്.

ആഷിക് അബു,ജെസ്‌ന അഷിം,ഹർഷാദ് അലി എന്നിവർ ചേർന്നാണ് ചിത്രം നിർമിച്ചിരിക്കുന്നത്.

മുഹ്‌സിൻ പരാരിയും സക്കറിയയും ചേർന്നാണ് തിരക്കഥ ഒരുക്കിയിട്ടുള്ളത്.

ഇന്ദ്രജിത് സുകുമാരൻ,ഗ്രേസ് ആന്റണി, ജോജു ജോർജ്,ഷറഫുദീൻ, സൗബിൻ ഷാഹിർ, പാർവതി തിരുവോത്ത്,നാസർ കറുത്തേനി, അഭിരാം പൊതുവാൾ, മാമുക്കോയ തുടങ്ങിയവരാണ് ചിത്രത്തിലെ പ്രധാന അഭിനേതാക്കൾ.

ബിജിബാൽ, ഷഹബാസ് അമൻ, റെക്സ് വിജയൻ എന്നിവരാണ് സംഗീതം പകർന്നിരിക്കുന്നത്.

പശ്ചാത്തല സംഗീതം യാക്സൺ ഗാരി, നേഹ നായർ എന്നിവരും നിർവഹിച്ചിരിക്കുന്നു.

അജയ് മേനോൻ ആണ് ക്യാമറ കാഴ്ചകൾ ഒരുക്കിയിരിക്കുന്നത്.

സമുദായിക ചുറ്റുപാടിൽ ജീവിക്കുന്ന ഒരു സംഘം കലാസ്നേഹികൾ ഒരു ഹോം സിനിമ നിർമ്മിക്കുവാൻ ശ്രമിക്കുന്നതാണ് ചിത്രത്തിന്റെ കഥാസന്ദർഭം.

സമുദായിക സംഘടനയുടെ നേതൃത്വത്തിൽ പിരിവ് നടത്തിയാണ് അവർ ഇതിന് വേണ്ട പണം സംഘടിപ്പിക്കുന്നത്.

തൗഫീഖ് തിരക്കഥാകൃത്തായും സിറാജ് സംവിധായകനായും തെരഞ്ഞടുക്കപ്പെടുന്നു.

അഭിനേതാക്കളായി ആ നാട്ടുകാരെ തന്നെ തീരുമാനിക്കുന്നു.

നായികാ നായകന്മാരായി ശരിക്കും ഭാര്യ ഭർത്താക്കന്മാർ ആയ ഷെരീഫിനേയും സുഹറയെയും തെരഞ്ഞെടുക്കുന്നു.

മറ്റ് വേഷങ്ങളിൽ  ആ നാട്ടിലെ നിഷ്കളങ്കരായ ആളുകൾ തന്നെ ആയിരുന്നു.

ആ സിനിമാ ചിത്രീകരണവും അതിനിടയിൽ അവരുടെ വ്യക്തി ജീവിതത്തിൽ ഉണ്ടാകുന്ന പ്രശ്നങ്ങളെക്കുറിച്ചുമാണ് ചിത്രം സംസാരിക്കുന്നത്.

ചിത്രത്തിൽ ഏറ്റവും എടുത്തു പറയേണ്ടത്  Music  ആണ്.

മനോഹരമായിരുന്നു..

ചിത്രത്തിന്റെ ആസ്വാദനത്തിന്  ഇത്  ഒരു വലിയ പങ്ക് വഹിക്കുന്നുണ്ട്.

സ്നേഹം വിശ്വാസം എന്നീ മൂല്യങ്ങളെ കുറിച്ചാണ് ചിത്രം സംസാരിക്കുന്നത്.

ഒട്ടേറെ മനോഹരമായ നിമിഷങ്ങൾ ചിത്രം സമ്മാനിക്കുന്നുണ്ട്..

സക്കറിയ നന്നായി തന്നെ ചിത്രം ഒരുക്കിയിട്ടുണ്ട്.

അർത്ഥവത്തായ സംഭാഷണങ്ങൾ ആണ് മറ്റൊരു പ്രത്യേകത.

വിഷ്വൽസും വളരെ മനോഹരമായിരുന്നു.

അഭിനേതാക്കൾ എല്ലാവരും തന്നെ മികച്ച പ്രകടനം കൊണ്ട് മനസ് നിറയ്ക്കുന്നുണ്ട്.

സുഹറയായി എത്തിയ ഗ്രേസ് ആന്റണിയുടെ പ്രകടനമാണ് എടുത്തു പറയേണ്ടത്. ഉജ്വല പ്രകടനമായിരുന്നു ഗ്രേസിന്റേത്.

ഷെരീഫ് ആയെത്തിയ ഇന്ദ്രജിത്തും മികച്ച പ്രകടനമായിരുന്നു.

നിസാർ ആയെത്തിയ ജോജുവും തൗഫീഖ് ആയെത്തിയ ഷറഫുദീനും

റഹിം സാഹിബ് ആയെത്തിയ നാസർ കറുത്തേനിയും പ്രകടനം കൊണ്ട് ഞെട്ടിക്കുന്നുണ്ട്.

സൗബിൻ ഷാഹിർ, പാർവതി തിരുവോത്ത് എന്നിവരും ചുരുങ്ങിയ സമയത്തെ പ്രകടനം കൊണ്ട് ഒരു ഓളം ഉണ്ടാക്കുന്നുണ്ട്.

പേരറിയാത്ത ഒട്ടേറെ കലാകാരന്മാർ മനോഹരമായ പ്രകടനം കാഴ്ചവെക്കുന്നുണ്ട്.

നർമത്തിൽ പൊതിഞ്ഞാണ് ചിത്രം കഥ പറയുന്നത്.

സക്കറിയയുടെ ആദ്യ സിനിമയായ സുഡാനി ഫ്രം നൈജീരിയ പോലെ മനോഹരമായ ഒരു അനുഭവം ചിത്രം സമ്മാനിക്കുന്നുണ്ട്.

മലയാളത്തിലെ മികച്ച ഫീൽ ഗുഡ് സിനിമകളുടെ ലിസ്റ്റിലേക്ക് ഈ സിനിമയും ചേർത്ത് വെയ്ക്കാം.

മിഥുൻ മഹേഷ്‌