🍉 പ്രണയത്തിന്റെ മധുരമൂറും "തണ്ണീർ മത്തൻ ദിനങ്ങൾ"🍉

നവാഗതനായ ഗിരീഷ് എ ഡി സംവിധാനം  ചെയ്ത തണ്ണീർ മത്തൻ ദിനങ്ങൾ എന്ന സിനിമ ഇന്ന് പുറത്തിറങ്ങി..
ജാതിക്കാത്തോട്ടം എന്ന ഗാനം തരംഗമായതോടെ യുവാക്കൾ വൻ പ്രതീക്ഷയോടെ കാത്തിരുന്ന സിനിമ കൂടിയായിരുന്നു ഇത്.
കുമ്പളങ്ങി നൈറ്റ്‌സിലൂടെ ശ്രദ്ധേയനായ മാത്യു തോമസ് നായക വേഷത്തിലെത്തുമ്പോൾ ഉദാഹരണം സുജാതയിലൂടെ ശ്രദ്ധേയയായ അനശ്വര രാജൻ ആണ്  നായികയാകുന്നത്.
വിനീത് ശ്രീനിവാസൻ മറ്റൊരു പ്രധാന വേഷത്തിലെത്തുന്ന ചിത്രം മനോഹരമായ ഒരു പ്രണയകഥയാണ് പറയുന്നത് .

ജോമോൻ ടി ജോൺ, ഷമീർ മുഹമ്മദ്, ഷെബിൻ ബക്കർ എന്നിവർ ചേർന്നാണ് ചിത്രം നിർമിച്ചിരിക്കുന്നത്.
ചിത്രത്തിന്റെ തിരക്കഥ ഒരുക്കിയത് ഗിരീഷ് എ ഡി യും ഡിനോയ് പൗലോസും ചേർന്നാണ്.
വിനോദ് ഇല്ലംപിള്ളിയും ജോമോൻ ടി ജോണും ചേർന്നാണ് ചിത്രത്തിന്റെ ക്യാമറ ചലിപ്പിക്കുന്നത്.
ജസ്റ്റിൻ വർഗീസ് ഈണമിട്ട ഗാനങ്ങൾ നേരത്തെ തന്നെ ശ്രദ്ധിക്കപ്പെട്ടിരുന്നു.
ഷമീർ മുഹമ്മദ് ആണ് എഡിറ്റിങ് നിർവഹിച്ചിരിക്കുന്നത്.

കൗമാര പ്രണയകഥ പറയുന്ന നിരവധി സിനിമകൾ മലയാളത്തിൽ ഇറങ്ങിയിട്ടുണ്ട്.
എന്നെന്നും കണ്ണേട്ടന്റെ തുടങ്ങി അടുത്ത കാലത്തിറങ്ങിയ ജൂൺ വരെയുള്ള സിനിമകൾ അക്കൂട്ടത്തിൽ പെടും.
അതിൽ നിന്നെല്ലാം വേറിട്ട ഒരു അനുഭവം സമ്മാനിക്കുന്ന സിനിമയാണ് തണ്ണീർ മത്തൻ ദിനങ്ങൾ.

തനി നാട്ടിൻപുറത്തുകാരൻ വിദ്യാർത്ഥിയാണ് ജെയ്സൺ.  ആകസ്മികമായാണ് അവൻ പ്ലസ് വൺ സയൻസ് ഗ്രൂപ്പിലേക്ക് വരുന്നത്. കൂട്ടുകാർക്കൊപ്പം ക്രിക്കറ്റ്‌ കളിയും ആഘോഷവും ഒക്കെയായി മധുരകരമായി അവന്റെ തണ്ണീർ മത്തൻ ദിനങ്ങൾ മുന്നോട്ട് പോകവെയാണ് അവന് സഹപാഠിയായ കീർത്തിയോട് പ്രണയം തോന്നുന്നത്.
പക്ഷേ കേട്ടപാടെ കീർത്തി അവന്റെ പ്രണയം നിരസിക്കുന്നു.എന്നിരുന്നാലും പിൻവാങ്ങാതെ ശുഭാപ്‌തി വിശ്വാസത്തോടെ അവൻ തന്റെ പ്രണയത്തിന്  പിന്നാലെ കറങ്ങുന്നു.
പക്ഷെ അപ്രതീക്ഷിതമായാണ് അവന്റെ പ്രണയത്തിനും ജീവിതത്തിനും തടസ്സമായി രവി പദ്മനാഭൻ എന്ന അദ്ധ്യാപകൻ എത്തുന്നത്.
തുടർന്ന് ജെയ്‌സന്റെ ജീവിതത്തിൽ സംഭവിക്കുന്ന രസകരമായ സംഭവങ്ങളാണ് ചിത്രം പറയുന്നത്.

മാത്യു തോമസ് ജെയ്സൺ ആയി മികച്ച പ്രകടനമായിരുന്നു.
ഒരു നോട്ടം കൊണ്ടും ചിരി കൊണ്ടുപോലും പ്രേക്ഷകരുടെ മനസ്സ് കീഴടക്കാൻ മാത്യുവിന് കഴിയുന്നുണ്ട്.
അത് പോലെ തന്നെ മനോഹരമായ പ്രകടനവും ചിരിയും എല്ലാം  കൊണ്ട് അനശ്വരയും പ്രേക്ഷക ഹൃദയങ്ങൾ കീഴടക്കുന്നുണ്ട്.
ജാതിക്കാത്തോട്ടം ഗാനരംഗത്തിലെന്ന പോലെ ഇരുവരുടെയും പ്രണയ രംഗങ്ങൾ മികച്ചു നിന്നു.

രവി പദ്മനാഭൻ ആയി വിനീത് ശ്രീനിവാസനും പ്രേക്ഷകരെ വിസ്മയിപ്പിക്കുന്നുണ്ട്. അല്പം എക്‌സെന്ററിക് ആയ കഥാപാത്രം സ്വതസിദ്ധമായ ശൈലി കൊണ്ട് വിനീത് മികച്ചതാക്കിയിട്ടുണ്ട്.
ജെയ്സന്റെ ചേട്ടൻ കഥാപാത്രത്തെ അവതരിപ്പിച്ച തിരക്കഥാകൃത്ത് കൂടിയായ ഡിനോയ് പൗലോസ് മികച്ച പ്രകടനമായിരുന്നു. ചിലയിടങ്ങളിൽ പ്രേക്ഷകരെ പൊട്ടിചിരിപ്പിക്കാൻ ഡിനോയ്ക്ക് കഴിഞ്ഞിട്ടുണ്ട്.
ശബരീഷ് വർമ, ഇർഷാദ്, നിഷ സാരംഗ് തുടങ്ങി ചിത്രത്തിലെ പുതുമുഖങ്ങൾ അടക്കമുള്ള  ഓരോ അഭിനേതാക്കളും മികച്ച പ്രകടനം തന്നെ കാഴ്ച വെച്ചിട്ടുണ്ട്.

ഗിരീഷ് എ ഡി മനോഹരമായി തന്നെ ചിത്രം ഒരുക്കിയിട്ടുണ്ട്.
ആദ്യാവസാനം ഒട്ടും ബോറടിപ്പിക്കാതെ രസകരമായാണ് ചിത്രം മുന്നേറുന്നത്.
ഒരു പുഞ്ചിരിയോടെയേ നമുക്ക് തീയറ്റർ വിട്ട് ഇറങ്ങാൻ  പറ്റുകയുള്ളൂ...അത്രമേൽ ഹൃദ്യമാണ് ഈ സിനിമ.
സംഗീതം, ക്യാമറ, എഡിറ്റിംഗ് തുടങ്ങി സാങ്കേതിക വശങ്ങളിലും സിനിമ മികച്ചു തന്നെ നിൽക്കുന്നുണ്ട്.

Predictable ആയ കഥ തന്നെയാണെങ്കിലും ഒരിടത്തും മുഷിപ്പിക്കാതെ വളരെ രസകരമായാണ് ചിത്രം മുന്നേറുന്നത്.
പൊട്ടിച്ചിരിപ്പിക്കുന്ന ചില വൺ ലൈൻ കോമഡി രംഗങ്ങളും ചിത്രത്തിലുണ്ട്.
കുടുംബ സമേതം ആദ്യാവസാനം രസിച്ചു കാണാവുന്ന നല്ലൊരു പ്രണയ സിനിമയാണ് തണ്ണീർ മത്തൻ ദിനങ്ങൾ.
തണ്ണീർ മത്തൻ എന്ന് പേര് സൂചിപ്പിക്കുന്ന പോലെ  കുളിർമയേറിയ, മധുരമായ  ഒരു അനുഭവം ചിത്രം സമ്മാനിക്കുന്നുണ്ട്.

മിഥുൻ മഹേഷ്‌.