BIGIL - Dalapathy Verithanam👏🙏

ദളപതി വിജയ് സിനിമകളുടെ റിലീസ് എല്ലാം ഒരു ആഘോഷമാണ്.

ദീപാവലി ആഘോഷത്തിന് മാറ്റ് കൂട്ടാൻ വിജയ് വീണ്ടും എത്തിയിരിക്കുകയാണ്.
തെരി, മെർസൽ എന്നീ ബ്ലോക്ക്‌ബസ്റ്റർ ഹിറ്റുകൾക്ക് ശേഷം സംവിധായകൻ  അറ്റ്ലീ വിജയ് കൂട്ടുകെട്ട് വീണ്ടും ഒന്നിക്കുന്ന സിനിമയാണ് "ബിഗിൽ".
സ്പോർട്സ് ആക്ഷൻ വിഭാഗത്തിൽ പെടുന്ന ബിഗിൽ നിർമിച്ചിരിക്കുന്നത്  AGS Entertainments ന്റെ ബാനറിൽ കലാപതി എസ് അഘോരം ആണ്.
നയൻ താര വിജയുടെ നായികയായി എത്തുമ്പോൾ റെബ മോണിക്ക, വർഷ ബൊല്ലമ്മ, ഇന്ദുജ തുടങ്ങി ഒരു പറ്റം പെൺകുട്ടികൾ ഫുട്ബാൾ താരങ്ങളായി സ്‌ക്രീനിലെത്തുന്നുണ്ട്.
ജാക്കി ഷ്റോഫ്, കതിർ, വിവേക്, യോഗി ബാബു, ഡാനിയേൽ ബാലാജി, ഐ എം വിജയൻ, ആനന്ദ് രാജ്, രാജ് കുമാർ തുടങ്ങി ഒരു വലിയ താരനിര ചിത്രത്തിൽ അണിനിരക്കുന്നുണ്ട്.

എ ആർ റഹ്മാൻ ആണ് ചിത്രത്തിന് സംഗീതം നൽകിയിരിക്കുന്നത്.
സംവിധായകൻ അറ്റ്ലീ, എസ് രാമ ഗിരിവാസൻ എന്നിവർ ചേർന്നാണ് ചിത്രത്തിന്റെ തിരക്കഥ രചിച്ചിരിക്കുന്നത്.
ജി കെ വിഷ്ണു ഛായാഗ്രഹണവും റൂബെൻ എഡിറ്റിംഗും നിർവഹിച്ചിരിക്കുന്നു.

റൗഡി ആയ മൈക്കേളിന് അപ്രതീക്ഷിതമായി തമിഴ്നാട് വനിതാ ഫുട്ബാൾ ടീമിന്റെ കോച്ച് ആയി മാറേണ്ടി വരുന്ന കഥയാണ് ചിത്രം പറയുന്നത്.
മോശം ജീവിത സാഹചര്യങ്ങളോട് മല്ലിട്ട് ഫുട്ബാൾ എന്ന തങ്ങളുടെ സ്വപ്നം സാക്ഷാത്കരിക്കുന്നതിനു വേണ്ടി  ഇറങ്ങി തിരിച്ച ഏതാനും പെണ്കുട്ടികളായിരുന്നു.
ആ ടീമിലെ താരങ്ങൾ.
അവരെ ജയിപ്പിക്കാൻ മൈക്കേൾ നടത്തുന്ന പോരാട്ടമാണ് പിന്നീട് നമ്മൾ കാണുന്നത്.

സ്പോർട്സ് രംഗത്ത് പെൺ താരങ്ങൾ നിരവധി അവഗണനകൾ നേരിടുന്നുണ്ട്.
അത് കൂടാതെ പെൺകുട്ടികളുടെ സ്വപ്നങ്ങൾക്ക് എത്രത്തോളം നമ്മൾ പിന്തുണ നല്കുന്നുണ്ടെന്നതും ചിന്തിക്കേണ്ട വിഷയമാണ്.
സ്ഥിരം വിജയ് ചിത്രങ്ങളിലേത് പോലെ ആക്ഷനും ഡാൻസും കോമഡിയും എല്ലാം ഈ ചിത്രത്തിലുമുണ്ടെങ്കിലും അതിനെല്ലാമുപരി നല്ല ഒരു സന്ദേശം ചിത്രം മുന്നോട്ട് വയ്ക്കുന്നുണ്ട്.

വിജയ് ഗംഭീര പ്രകടനമാണ് ചിത്രത്തിൽ കാഴ്ച വെച്ചിരിക്കുന്നത്.
സസ്പെൻസ് ഉള്ളത് കൊണ്ട് കഥാപാത്രത്തെ കുറിച്ച് കൂടുതൽ വിവരിക്കുന്നത് Spoiler ആകും.
ആക്ഷനും ഡാൻസും കോമഡിയും ഇമോഷനും എല്ലാം വളരെ മികച്ച രീതിയിൽ തന്നെ വിജയ് അവതരിപ്പിച്ചിട്ടുണ്ട്.
നയൻ താരയും പതിവുപോലെ തന്റെ കഥാപാത്രം മികച്ചതാക്കിയിട്ടുണ്ട്.
ഫുട്ബാൾ താരങ്ങളായെത്തിയ പെൺകുട്ടികൾ എല്ലാവരും നല്ല പ്രകടനമായിരുന്നു.
വില്ലൻ ആയെത്തിയ ജാക്കി ഷ്റോഫ് തുടങ്ങി എല്ലാ നടീനടന്മാരും നല്ല പ്രകടനമായിരുന്നു.

വിജയ് ആരാധകർക്ക് ആഘോഷിക്കാൻ വേണ്ടതെല്ലാം ചിത്രത്തിലുണ്ട്.
വളരെ മികച്ച രീതിയിൽ തന്നെ അറ്റ്ലീ ചിത്രം ഒരുക്കിയിട്ടുണ്ട്.
സ്പോർട്സ് രംഗങ്ങൾ എല്ലാം മികച്ച നിലവാരം പുലർത്തി.

മുൻ ചിത്രങ്ങളിൽ എന്ന പോലെ സാമൂഹിക പ്രാധാന്യമുള്ള ഒരു വിഷയം തന്നെയാണ് അറ്റ്ലീ ചിത്രത്തിനായി തിരഞ്ഞെടുത്തത്.
എ ആർ റഹ്മാന്റെ സംഗീതവും വളരെ മികച്ചതായിരുന്നു.
ക്യാമറ, എഡിറ്റിംഗ് തുടങ്ങി സാങ്കേതിക മേഖലകളിലും ചിത്രം മികച്ചു നിൽക്കുന്നുണ്ട്.

ക്ലീഷേ ആയി തോന്നിയ ചില രംഗങ്ങൾ ഒഴിച്ചു നിർത്തിയാൽ വളരെ മികച്ച ഒരു അനുഭവമാണ് ചിത്രം സമ്മാനിച്ചത്.
സിനിമ  ഒരിടത്തും നമ്മളെ ബോറടിപ്പിക്കുന്നില്ല.
കുട്ടികൾക്കും യുവാക്കൾക്കും കുടുംബ പ്രേക്ഷകർക്കും ആഘോഷത്തോടെ  കണ്ടിരിക്കാൻ കഴിയുന്ന നല്ലൊരു സിനിമ തന്നെയാണ് ബിഗിൽ.

മിഥുൻ മഹേഷ്‌