Excellent Finals🙏🙏

ഓണം റിലീസ് ആയി തീയറ്ററുകളിൽ എത്തിയ മറ്റൊരു സിനിമയാണ് ഫൈനൽസ്.
നവാഗതനായ പി ആർ അരുൺ ആണ് ചിത്രം തിരക്കഥ എഴുതി സംവിധാനം ചെയ്തിരിക്കുന്നത്.
രജിഷ വിജയൻ, സുരാജ് വെഞ്ഞാറമൂട്, നിരഞ്ജ് മണിയൻപിള്ള രാജു എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.
മണിയൻപിള്ള രാജു, പ്രജീവ് സത്യവർത്തൻ എന്നിവർ ചേർന്നാണ് ചിത്രം നിർമിച്ചിരിക്കുന്നത്.
ഒരു തനി നാട്ടിൻപുറത്തുകാരി പെൺകുട്ടിയുടെ ഒളിമ്പിക്സ് മെഡൽ സ്വപ്നത്തിന്റെ കഥയാണ് ചിത്രം പറയുന്നത്.

ആലീസ് എന്ന കട്ടപ്പനക്കാരി പെൺകുട്ടിയുടെ ജീവിത ലക്ഷ്യമാണ് ഒളിമ്പിക്സ് മെഡൽ. അവളുടെ അപ്പനും കോച്ചുമായ വർഗീസ് മാഷിന്റെ കഠിന പ്രയത്നങ്ങൾ കൊണ്ടാണ് ആലീസ് ഇന്ന് ഈ നേട്ടങ്ങൾക്ക് അരികെയെത്തിയത്.
സൈക്ലിംഗ് താരമായ ആലീസ് 2020 ടോക്കിയോ ഒളിമ്പിക്സ് നുള്ള തയ്യാറെടുപ്പിലാണ്.
അയൽവാസിയും ബാല്യകാല സുഹൃത്തുമായ മാനുവലുമായി അവൾ പ്രണയത്തിലുമാണ്.
എന്നാൽ അപ്രതീക്ഷിതമായി  സംഭവിക്കുന്ന ഒരു അപകടം അവരുടെ ജീവിതം മാറ്റിമറിക്കുന്ന കഥയാണ് ഫൈനൽസ് പറയുന്നത്.

 സ്പോർട്സ്  ഡ്രാമ വിഭാഗത്തിൽ പെടുന്ന സിനിമയാണ് ഫൈനൽസ് എങ്കിലും ഹൃദയസ്പർശിയായ ഒരു കഥ കൂടി ചിത്രം പറയുന്നുണ്ട്.
സംവിധായകൻ പി ആർ അരുൺ തന്റെ ആദ്യ ചിത്രം വളരെ മികച്ച രീതിയിൽ അവതരിപ്പിച്ചിട്ടുണ്ട്.
സുദീപ് ഇളമൺ ആണ് ഛായാഗ്രഹണം നിർവഹിച്ചിരിക്കുന്നത്.
സൈക്ലിംഗ് മത്സര രംഗവും ആക്‌സിഡന്റ് സീനും ആകാശ ദൃശ്യങ്ങളും എല്ലാം വളരെ മികച്ച രീതിയിൽ തന്നെ അദേഹം ചിത്രീകരിച്ചിട്ടുണ്ട്.
കൈലാസ് മേനോൻ ഈണമിട്ട ചിത്രത്തിലെ ഗാനങ്ങളും മികച്ചു നിന്നു.

തന്റെ ആദ്യ ചിത്രത്തിൽ തന്നെ മികച്ച നടിക്കുള്ള സംസ്ഥാന അവാർഡ് നേടിയ രജീഷ വിജയൻ ഈ ചിത്രത്തിലും മികച്ച പ്രകടനം ആവർത്തിക്കുന്നുണ്ട്.
ആലീസ് എന്ന കഥാപാത്രം രജീഷയുടെ കൈകളിൽ ഭദ്രമായിരുന്നു .
വർഗീസ് മാഷ് ആയെത്തിയ സുരാജ് വെഞ്ഞാറമൂട് വളരെ മികച്ച രീതിയിൽ ആ കഥാപാത്രത്തെ അവതരിപ്പിച്ചിട്ടുണ്ട്.
ഇമോഷണൽ രംഗങ്ങൾ എല്ലാം വളരെ നന്നായി തന്നെ അദ്ദേഹം അവതരിപ്പിച്ചു.
മാനുവൽ എന്ന കഥാപാത്രത്തെ അവതരിപ്പിച്ച നിരഞ്ജ് വളരെ ശ്രദ്ധേയമായ പ്രകടനം കാഴ്ച വെച്ചിട്ടുണ്ട്.
നിരഞ്ജിന്റെ കരിയറിലെ തന്നെ മികച്ച കഥാപാത്രങ്ങളിൽ ഒന്നാണ് മാനുവൽ.
മണിയൻപിള്ള രാജു, ടിനി ടോം, കുഞ്ചൻ, സോന നായർ, മുത്തുമണി, നിസ്താർ തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.

നമ്മുടെ  കായിക മേഖലയിൽ അരങ്ങേറുന്ന  അഴിമതിയുടെയും അധികാര ദുർവിനോയോഗത്തിന്റെയും കാണാ കാഴ്ചകൾ ചിത്രം കാണിച്ചുതരുന്നു.
കായിക താരങ്ങൾ ഇന്ന് നിരവധി പ്രതിസന്ധികൾ നേരിടുന്നുണ്ട്.
കായിക മേഖലയിലെ അഴിമതിയും പ്രശ്നങ്ങളുമൊക്കെ ചിത്രം തുറന്ന് കാട്ടുന്നുണ്ട്.

ഈ വർഷത്തെ  മികച്ച സിനിമകളിൽ ഒന്ന് തന്നെയാണ് ഫൈനൽസ്.
സൈക്ലിംഗ് മത്സര രംഗവും തുടർന്നുള്ള ഇന്റർവെൽ ബ്ലോക്കും ശരിക്കും ഞെട്ടിക്കുന്നതായിരുന്നു.
രണ്ടാം പകുതിയിലെ ചില രംഗങ്ങൾ നിറ കണ്ണുകളോടെയേ കാണുവാൻ സാധിക്കൂ.
കാണുന്ന ഓരോ പ്രേക്ഷകന്റെയും ഹൃദയത്തെ സ്പർശിക്കുന്ന മികച്ച അനുഭവമാണ് ഫൈനൽസ് സമ്മാനിക്കുന്നത്.
അതുകൊണ്ട് തന്നെ തീർച്ചയായും കണ്ടിരിക്കേണ്ട സിനിമകളിൽ ഒന്ന് തന്നെയാണ് ഫൈനൽസ്.

മിഥുൻ മഹേഷ്‌