HELEN- Awesome Thriller👌👌🙏

നടനും സംവിധായകനും തിരക്കഥാകൃത്തും ഗായകനും എന്ന് വേണ്ട മലയാള സിനിമയിലെ സകല കലാ വല്ലഭനായ വിനീത് ശ്രീനിവാസൻ നിർമിച്ച ഒരു പുതിയ സിനിമയാണ് "ഹെലൻ".

നവാഗതനായ മാത്തുക്കുട്ടി സേവ്യർ ആണ് ചിത്രം സംവിധാനം ചെയ്തിരിക്കുന്നത്.
കുമ്പളങ്ങി നൈറ്റ്‌സ് സിനിമയിലെ ബേബി മോൾ ആയി പ്രേക്ഷക ഹൃദയം കീഴടക്കിയ അന്ന ബെൻ ആണ് ചിത്രത്തിലെ ടൈറ്റിൽ കഥാപാത്രമായ ഹെലെനെ അവതരിപ്പിക്കുന്നത്.
ലാൽ, അജു വർഗീസ്, നോബിൾ ബാബു തോമസ്, റോണി ഡേവിഡ്, ബിനു പപ്പു എന്നിവരാണ് മറ്റ് പ്രധാന വേഷങ്ങളിൽ എത്തുന്നത്.

സംവിധായകൻ മാത്തുക്കുട്ടി സേവ്യർ, ആൽഫ്രഡ്‌ കുര്യൻ ജോസഫ്, നോബിൾ ബാബു തോമസ് എന്നിവർ ചേർന്നാണ് ചിത്രത്തിന്റെ തിരക്കഥ രചിച്ചിരിക്കുന്നത്.
ആനന്ദ് സി ചന്ദ്രൻ ഛായാഗ്രഹണവും ഷാൻ റഹ്മാൻ സംഗീതവും ഷമീർ മുഹമ്മദ് എഡിറ്റിംഗും നിർവഹിച്ചിരിക്കുന്നു.

Survival Thriller  കാറ്റഗറിയിൽ പെടുന്ന സിനിമയാണ് ഹെലൻ.
ഹെലൻ,  നഴ്സിംഗ് പഠനം കഴിഞ്ഞ് കാനഡയിൽ ജോലിക്ക് പോകുവാനുള്ള ഒരുക്കത്തിലാണ്.
മകളെ ഏറെ സ്നേഹിക്കുന്ന അപ്പൻ പോളിന് മകളെ വിദേശത്തേക്ക് അയക്കാൻ താല്പര്യമില്ല.
ഹെലൻ ഇപ്പോൾ ഗ്രാൻഡ് മാളിലെ Chicken Hubൽ വർക്ക്‌ ചെയ്യുകയാണ്.
അസർ ആയുള്ള അവളുടെ പ്രണയവും അപ്പനോടുള്ള സ്നേഹവും ഒക്കെയായി അവളുടെ ജീവിതം മുന്നേറുകയാണ്.
അപ്രതീക്ഷിതമായി ഒരു രാത്രിയിൽ
Chicken Hub ലെ ഫ്രീസറിൽ അവൾ കുടുങ്ങി പോകുന്നു.
തുടർന്ന് ഉദ്വേഗ ജനകമായ രംഗങ്ങളിലൂടെ സിനിമ മുന്നേറുന്നു.

Excellent എന്ന് ഒരു സംശയവും കൂടാതെ വിശേഷിപ്പിക്കാൻ കഴിയുന്ന ഒരു സിനിമയാണ് ഹെലൻ.
സംവിധായകൻ മാത്തുക്കുട്ടി സേവ്യർ വളരെ മികച്ച രീതിയിൽ ചിത്രം ഒരുക്കിയിട്ടുണ്ട്. Survival Thriller എന്ന കാറ്റഗറിയിൽ നിന്നും കുടുംബ ബന്ധങ്ങളും പ്രണയവും ഇമോഷനും  എല്ലാം ഭംഗിയായി കാണിച്ചു തരുന്നുണ്ട് ചിത്രം.
ഫ്രീസറിലെ കൊടും തണുപ്പ് പലപ്പോഴും പ്രേക്ഷകനും അനുഭവിച്ചറിയാൻ  കഴിയുന്നുണ്ട്.

കുമ്പളങ്ങിക്ക് ശേഷം ഒരിക്കൽ കൂടി അന്ന ബെൻ വിസ്മയിപ്പിച്ചു കളഞ്ഞു.
ഹെലൻ ആയി അന്ന ഉജ്വല പ്രകടനമായിരുന്നു.
പ്രണയവും ഇമോഷനും ഫ്രീസറിനുള്ളിലെ അതിജീവന നിമിഷങ്ങളും എല്ലാം അന്ന മികച്ചതാക്കിയിട്ടുണ്ട്.

പോൾ ആയി ലാലും മികച്ച പ്രകടനമായിരുന്നു.
ജേക്കബിന്റെ സ്വർഗ്ഗരാജ്യം സിനിമയുടെ നിർമാതാവും ഹെലന്റെ തിരക്കഥാകൃത്തുക്കളിൽ ഒരാളുമായ നോബിൾ ബാബു തോമസ് ആണ് അസർ എന്ന കഥാപാത്രത്തെ അവതരിപ്പിച്ചത്.
അദ്ദേഹം നന്നായി തന്നെ അസറിനെ അവതരിപ്പിച്ചിട്ടുണ്ട്.

എടുത്തു പറയേണ്ട മറ്റൊരു പ്രകടനം സബ് ഇൻസ്‌പെക്ടർ രതീഷ് എന്ന കഥാപാത്രത്തെ അവതരിപ്പിച്ച അജു വർഗീസിന്റെതാണ്.
നെഗറ്റീവ് shade ഉള്ള ആ വേഷം വളരെ മികച്ചതാക്കിയിട്ടുണ്ട് അജു.
അജുവിലെ ഒരു മികച്ച നടന്റേതായുള്ള ചില സൂചനകൾ ചിത്രത്തിൽ കാണാം.

റോണി ഡേവിഡ്, ബിനു പപ്പു, ബോണി മേരി തുടങ്ങി ചിത്രത്തിലെ മറ്റ് നടീനടന്മാരും അവരവരുടെ വേഷം മികച്ചതാക്കിയിട്ടുണ്ട്.

ആനന്ദ് സി ചന്ദ്രന്റെ മികച്ച ക്യാമറ വർക്കും ഷാൻ റഹ്മാന്റെ മികച്ച സംഗീതവും ഷമീർ മൊഹമ്മദിന്റെ എഡിറ്റിംഗും തുടങ്ങി  ചിത്രത്തിന്റെ മറ്റ് സാങ്കേതിക വിഭാഗങ്ങൾ എല്ലാം മികച്ചതായിരുന്നു.
ഫ്രീസർ ഉൾപ്പടെയുള്ള ആർട്ട്‌ വർക്കുകളും നന്നായിരുന്നു.

വിനീത് ശ്രീനിവാസൻ എന്ന പേര് നിർമാതാവിന്റെ സ്ഥാനത്തു കാണുമ്പോൾ തന്നെ സിനിമ നല്ലതായിരിക്കും എന്ന പ്രതീക്ഷ  ഉണ്ടായേക്കും.
പക്ഷേ പ്രതീക്ഷിച്ചതിലും വളരെ മികച്ച ഒരു സിനിമയാണ് ഹെലൻ.
മലയാളത്തിൽ അധികം കാണാത്ത Survival Thriller കാറ്റഗറിയിൽ കഥ പറയുന്ന സിനിമ ഒരു  Edge Of Seat Thrilling എക്സ്പീരിയൻസ് നൽകുന്നുണ്ട്.
അഭിനേതാക്കളുടെ മികച്ച പ്രകടനം, സാങ്കേതികമായ മികവ് എന്നിവ കൊണ്ട് തന്നെ ഈ വർഷം ഇറങ്ങിയതിൽ വച്ച് ഏറ്റവും മികച്ച സിനിമകളിൽ ഒന്നാണ് ഹെലൻ.

മിഥുൻ മഹേഷ്‌