Kaithi- Action Block Buster 👏👏🙏

മാനഗരം എന്ന തന്റെ ആദ്യ ചിത്രം കൊണ്ട് തന്നെ ഏറെ ശ്രദ്ധിക്കപ്പെട്ട ഒരു യുവ സംവിധായകനാണ് ലോകേഷ് കനകരാജ്.

അദ്ദേഹത്തിന്റെ രണ്ടാമത്തെ സിനിമയായ കൈതി ദീപാവലി റിലീസ് ആയി എത്തിയിരിക്കുകയാണ്.
മുഴുനീള ആക്ഷൻ സിനിമയായ കൈതിയിൽ കാർത്തി ആണ് നായകനായി എത്തുന്നത്.
സംവിധായൻ തന്നെയാണ് ചിത്രത്തിന് തിരക്കഥ ഒരുക്കിയിരിക്കുന്നത്.
ഒറ്റ രാത്രിയിൽ നടക്കുന്ന ഒരു കഥയാണ് ചിത്രം പറയുന്നത്.

പത്തു വർഷത്തെ ജയിൽ ശിക്ഷയ്ക്ക് ശേഷം പുറത്തിറങ്ങുന്ന ഡില്ലി അനാഥാലയത്തിൽ കഴിയുന്ന തന്റെ മകളെ  കാണാനുള്ള യാത്രയിലാണ്.
ഇൻസ്‌പെക്ടർ ബിജോയിയും സംഘവും കണ്ടെടുത്ത മയക്കുമരുന്ന് തിരിച്ചു പിടിക്കാൻ വേണ്ടി ഒരു സംഘം ആളുകൾ അതേ രാത്രി പോലീസ് സ്റ്റേഷൻ ആക്രമിക്കാൻ പദ്ധതിയിടുന്നു.
ഒരു പാർട്ടിയിൽ വെച്ച് മയക്കുമരുന്ന് വേട്ടയിൽ പങ്കെടുത്ത പോലീസുകാർ വിഷം കഴിക്കപ്പെട്ടു അവശ നിലയിലാകുന്നു.
അവരെ ഹോസ്പിറ്റലിൽ എത്തിക്കാൻ ഇൻസ്‌പെക്ടർ ബിജോയ്ക്ക് ആ രാത്രി കണ്ടുമുട്ടിയ ഡില്ലിയുടെ സഹായം വേണ്ടി വരുന്നു.  എന്നാൽ ഇൻസ്‌പെക്ടർ ബിജോയെ ആക്രമിക്കാൻ അക്രമികൾ അവരുടെ പിന്നാലെ പോകുന്നു.
എന്നാൽ വാസ്തവത്തിൽ ഡില്ലി ആരാണെന്ന് അവർക്ക് ആർക്കും അറിയില്ലായിരുന്നു.

കാതടിപ്പിക്കുന്ന ഗംഭീര  സംഘട്ടന രംഗങ്ങളാണ് പിന്നീട് നമ്മൾ കാണുന്നത്.
മികവുറ്റ ആക്ഷൻ രംഗങ്ങൾ തന്നെയാണ് ചിത്രത്തിന്റെ ഹൈലൈറ്റ്.
സംവിധായകൻ ലോകേഷ് കനകരാജ് ഗംഭീരമായി തന്നെ ചിത്രം ഒരുക്കിയിട്ടുണ്ട്.
പോലീസ് സ്റ്റേഷൻ ആക്രമണ രംഗങ്ങളും ആക്ഷൻ രംഗങ്ങളും എല്ലാം വളരെ മികച്ചതായിരുന്നു.

കാർത്തി ഡില്ലി ആയി തകർപ്പൻ പ്രകടനം തന്നെ കാഴ്ച വെക്കുന്നുണ്ട്. ആക്ഷൻ രംഗങ്ങളിൽ എല്ലാം അസാധ്യ പെർഫോമൻസ് ആയിരുന്നു കാർത്തി. കാർത്തിയുടെ കരിയർ ബെസ്റ്റ് പ്രകടനങ്ങളിൽ ഒന്ന് തന്നെയാണ് കൈതിയിലേത്.
ഇൻസ്‌പെക്ടർ ബിജോയ്‌ ആയി നരേൻ നല്ല പ്രകടനമായിരുന്നു.
വില്ലൻ കഥാപാത്രത്തെ അവതരിപ്പിച്ച അർജുൻ ദാസ് ശ്രദ്ധേയമായ പ്രകടനം കാഴ്ച വെച്ചിട്ടുണ്ട്.
ദീന, ഹാരിഷ് ഉത്തമൻ, ജോർജ് മരിയൻ, ഹരീഷ് പേരടി, രമണ, മാളവിക അവിനാശ്, അംസത് ഖാൻ തുടങ്ങി എല്ലാ നടീനടന്മാരും തങ്ങളുടെ വേഷം മികച്ചതാക്കിയിട്ടുണ്ട്.

സാം C S ന്റെ പശ്ചാത്തല സംഗീതം പ്രേക്ഷകരിൽ ആവേശം സൃഷ്ടിക്കുന്നുണ്ട്.
രാത്രി കാഴ്ചകൾ മനോഹരമായി തന്നെ ഛായാഗ്രാഹകൻ സത്യൻ സൂര്യൻ ക്യാമെറയിൽ പകർത്തിയിട്ടുണ്ട്.
ഫിലോമിൻ രാജിന്റെ എഡിറ്റിംഗും മികച്ചതായിരുന്നു.

ഒരു രാത്രി നടക്കുന്ന ഒരു കഥ വളരെ ത്രില്ലിംഗ് ആയി  മികച്ച രീതിയിൽ സംവിധായകൻ ലോകേഷ് കനകരാജ്  ഒരുക്കിയിട്ടുണ്ട്.
കാർത്തിയുടെ മികച്ച പ്രകടനം കൊണ്ടും  എഴുന്നേറ്റ് നിന്ന് കയ്യടിച്ചു പോകുന്ന ഗംഭീര ആക്ഷൻ രംഗങ്ങൾ കൊണ്ടും തീർച്ചയായും കണ്ടിരിക്കേണ്ട ഒരു ആക്ഷൻ ത്രില്ലെർ സിനിമയാണ് കൈതി.

മിഥുൻ മഹേഷ്‌